अहिल्यानगर महानगरपालिकेने शटडाऊनदरम्यान पाणीपुरवठा व्यवस्थेच्या दुरुस्तीवर भर दिला
शटडाऊनचा सदुपयोग करून मेगा दुरुस्तीमुळे पाणी व्यवस्था झाली अधिक कार्यक्षम
२८ एप्रिल २०२५, अहिल्यानगर: २६ एप्रिल रोजी नियोजित विजेच्या शटडाऊनचा वापर करून अहिल्यानगर महानगरपालिकेने शहरभरातील पाणीपुरवठा यंत्रणेच्या दुरुस्ती व देखभालीची मोठी कामे हाती घेतली. यामुळे पाण्याच्या गळतीत लक्षणीय घट झाली असून पुरवठा व्यवस्था अधिक कार्यक्षम बनली आहे. आयुक्त तथा प्रशासक श्री. यशवंत डांगे यांच्या मार्गदर्शनाखाली ही कार्यवाही पार पडली.
मुळा नगर येथील ११ केव्ही मेन आयसोलेटरवर नवीन करंट ट्रान्सफॉर्मर बसवण्यात आला तर १०० केव्ही/२५०० केव्ही ट्रान्सफॉर्मरमध्ये तेल भरून लेव्हलिंग केले गेले. विळद येथील नवीन पंपहाऊसमध्ये ६०० एचपी पंप व मोटारची देखभाल करण्यात आली, तर नागपूरमध्ये १०० व २६८ एचपी मोटर्सना ग्रीस व तेल भरले गेले. या दुरुस्तीमुळे पाणीपुरवठा अधिक स्थिर होणार आहे.
शहरभर लीकेज दुरुस्ती अंतर्गत प्रभाग १ अंतर्गत नागपूर पितळे कॉलनी, डॉन बॉस्को कृष्णा अपार्टमेंट, नंदनवन नगर येथील पाईप लाईनमधील लीकेज दुरुस्त करण्यात आल्या. प्रभाग ३ व ४ मध्ये ९०० मिमी व १००० मिमी पीएससी पाईप लाईनच्या लीकेज दुरुस्त करून पाणी वाया जाण्यावर नियंत्रण मिळवले गेले. मुकुंदनगर झोनमध्ये जिल्हाधिकारी कार्यालयाजवळील ४” मेन लाईन लीकेज व गोविंदपुरा मेन लाईनची दुरुस्ती करण्यात आली.
या शटडाऊनदरम्यान महावितरण कंपनीने ३३ केव्ही मुळा डॅम विद्युत वाहिनीवर केलेल्या ट्री कटिंग व देखभालीच्या कामांसाठी घेतलेल्या शटडाऊनचा फायदा महानगरपालिकेने पाणीपुरवठा व्यवस्थेच्या दुरुस्तीसाठी घेतला. यामुळे स्वतंत्र शटडाऊन घेण्याची गरज न राहिल्याने नागरिकांच्या तात्पुरत्या गैरसोयीत घट झाली आहे.
या योजनाबद्ध शटडाऊनदरम्यान केलेल्या दुरुस्ती व सुधारणांमुळे शहराच्या पाणीपुरवठा व्यवस्थेला गतिमानता मिळणार आहे. यामुळे नागरिकांना अखंडित व गुणवत्तापूर्ण पाणीपुरवठा उपलब्ध होईल, तसेच पाण्याच्या बचतीसाठीही ही कामे महत्त्वपूर्ण ठरली असल्याचे आयुक्त श्री. यशवंत डांगे यांनी सांगितले आहे.
