अहिल्यानगरः शहराचा पाणीपुरवठा गेल्या आठवड्यात तीन दिवस विस्कळीत झाला होता. आता पुन्हा मुळानगर पाणी योजनेवरील उपसा पंप नादुरुस्त झाल्यामुळे शहर व उपनगराचा पाणीपुरवठा एक दिवस विलंबाने होणार असल्याची माहिती महापालिकेने कळवली आहे.
मुळानगर उपसा केंद्रात ७२५ अश्वशक्तीचे २ व ४०० चे २ पंप चालवून शहरास पाणीपुरवठा होतो. उन्हाळ्यामुळे मुळा धरणाची पातळी खालावली आहे. त्यामुळे ४०० अश्वशक्तीचा पर्यायी पंप चालवावा लागतो. हा पर्यायी पंप शुक्रवारी रात्री नादुरूस्त झाला. तसेच ७२५ चा पर्यायी पंपही दुरुस्तीसाठी बंद आहे. मनपाकडे सद्य:स्थितीत अतिरिक्त पंप उपलब्ध नसल्याने मुळानगर येथून होणारा पाण्याचा उपसा कमी झाला आहे. त्यामुळे शहरातील प्रत्येक भागांत एक दिवसाने उशिरा पाणीपुरवठा होणार आहे.
आज, शनिवार बोल्हेगाव, नागापूर, सावेडी उपनगरातील पाईपलाइन रस्ता, लक्ष्मीनगर, सूर्यनगर, निर्मलनगर, मुकुंदनगर, तसेच सारसनगर, बुरूडगाव रस्ता, केडगाव, नगर-कल्याण रस्त्यावरील शिवाजीनगर परिसरास पाणीपुरवठा झाला नाही. या भागात उद्या, रविवारी पाणीपुरवठा होईल तर, रविवारी रोटेशननुसार पाणीवाटप असलेल्या सिध्दार्थनगर, लालटाकी, तोफखाना, दिल्लीगेट, नालेगाव, चितळे रस्ता, आनंदीबाजार, कापड बाजार, ख्रिस्त गल्ली, पंचपीर चावडी, जुने मनपा कार्यालय परिसर, माळीवाडा, बालिकाश्रम रस्ता परिसर व सावेडी या भागास सोमवारी (दि. १२) पाणी सोडले जाईल.
सोमवारी पाणीपुरवठा होणाऱ्या मंगलगेट, रामचंद्रखुंट, झेंडीगेट, जिल्हाधिकारी कार्यालय परिसर, दाळमंडई, काळू बागवान गल्ली, धरती चौक, बंगाल चौकी, माळीवाडा, कोठी या भागात व गुलमोहर रस्ता, प्रोफेसर कॉलनी परिसर, सिव्हील हाडको, प्रेमदान हाडको, टीव्ही सेंटर, म्युनिसीपल हाडको, स्टेशन रस्ता, आगरकर मळा, विनायक नगर या भागास मंगळवारी (१३ मे) पाणीपुरवठा होईल असे महापालिकेकडून सांगण्यात आले.
