बारामतीमधील पोटनिवडणुकीसाठी उपमुख्यमंत्री सुनेत्रा पवार आज सोमवारी अर्ज भरणार आहेत. बारामती विधानसभा निवडणूक बिनविरोध होण्यासाठी राष्ट्रवादी काँग्रेसने प्रयत्न सुरू केले आहेत. बारामती पोटनिवडणुकीसाठी ओबीसी लक्ष्मण हाके यांनी डाव टाकला होता. परंतु राष्ट्र्वादी काँग्रेसने विनंती केल्यानंतर लक्ष्मण हाके यांनी माघार घेतली आहे. हाके यांनी माघार घेतल्यानंतर आता सुनेत्रा पवार यांच्यासमोर काँग्रेस उमेदवाराचे आव्हान असणार आहे.
ओबीसी नेते लक्ष्मण हाके यांनी आज बारामतीत पत्रकार परिषद घेतली. या पत्रकार परिषदेला मंत्री दत्ता भरणे आणि धनंजय मुंडे उपस्थित होते. या पत्रकार परिषदेत राष्ट्रवादी काँग्रेसच्या नेत्यांच्या विनंतीनंतर ओबीसी नेते लक्ष्मण हाके यांनी पोटनिवडणुकीतून माघार घेत असल्याचे जाहीर केले.
लक्ष्मण हाके म्हणाले, ‘आम्ही बारामतीत काही प्रश्नाबाबत निवडणुकीत उतरणार होतो. ओबीसी नेता म्हणून मी लढत होतो. मी विद्रोही आक्रमकपणे भूमिका मांडत होतो. मला मुख्यमंत्री, उपमुख्यमंत्री, मंत्री उदय सामंत, मंत्री भरणे मामा यांनी मला विनंती केली. राज्यात माझे प्रश्न मांडत राहील. लोकांची सहानुभूती आहे. अनेक मागण्या आहेत. १८ महामंडळ सांगितले आहेत. त्याला अजून अध्यक्ष नाही, कार्यालय नाही, बजेट नाही. सुनेत्रा पवार यांचा कॉल आला. एवढ्या सगळ्यांचे फोन आले. त्यामुळे मी ठरवले की, आपण थांबायला पाहिजे. आमच्या मागण्याबाबत मी समाधानी नाही. मी मागण्यांवर कायम ठाम आहे’.
मंत्री दत्ता भरणे म्हणाले, ‘बारामती पोटनिवडणूक होत आहे. राज्याचे अजित पवार यांचे निधन झाल्यानंतर निवडणूक होत आहे. राष्ट्रवादी काँग्रेसकडून सुनेत्रा पवार लढवत असताना ती बिनविरोध व्हावी, त्यासाठी लक्ष्मण हाके यांना विनंती करत आहे. चर्चा केल्यानंतर आता का निवडणूक बिनविरोध होणे का गरजेचे आहे, हाके यांना सांगितले. लक्ष्मण हाके सर चांगल्या भूमिकेला पाठिंबा देतील’.
