नगर-शहरातील दिल्लीगेट परिसरात पाणीपुरी विक्रेत्याने दारू पिण्यासाठी पैसे न दिल्याचा राग आल्याने ओळखीच्या इसमाने लाकडी दांड्याने डोयात मारहाण केली. या हल्ल्यात पीडित जखमी झाला असून सिव्हिल हॉस्पिटलमध्ये त्याच्यावर उपचार करण्यात आले आहेत. ही घटना १८ सप्टेंबर रोजी रात्री ८ वाजता घडली.
फिर्यादी देवेंद्र विरसिंग कुसवाह (वय ३४, रा. दातरंगे मळा, नालेगाव, अहिल्यानगर) हे दिल्लीगेट परिसरात पाणीपुरीची टपरी लावून उदरनिर्वाह करतात. गुरुवारी रात्री ते टपरीवर असताना आदित्य लहु सकट (रा. मुन्सीपल कॉलनी, नालेगाव, अहिल्यानगर) व त्याचा एक अनोळखी साथीदार दारूच्या नशेत तेथे आले. त्यांनी देवेंद्रकडे दारू पिण्यासाठी पैसे मागितले. मात्र देवेंद्र यांनी नकार दिल्याने आदित्य सकट चिडला व मी तुला पैसे न दिल्याचा बदला घेतो असे म्हणत निघून गेला.
थोड्याच वेळात रात्री आठच्या सुमारास आदित्य सकट परत आला. त्याच्या हातात लाकडी दांडा होता व सोबत तोच अनोळखी इसम होता. काहीही कारण नसताना त्याने देवेंद्रच्या डोयात दांडयाने जोराचा प्रहार केला. या प्रहारात देवेंद्रच्या डोयातून रक्त वाहू लागले व ते खाली कोसळले. दरम्यान, आदित्य सकट याने मी तुला आज जिवंत सोडणार नाही असे म्हणत टपरीवर दांडके मारून नुकसान केले.
त्याच्यासोबत असणार्‍या अनोळखी साथीदारानेही शिवीगाळ केली व जर पुन्हा पैसे दिले नाहीस तर पुढच्या वेळी जिवंत सोडणार नाही अशी धमकी दिली.या घटनेत जखमी झालेल्या देवेंद्रला त्याचा भाऊ अनारसिंग कुसवाह याने तातडीने सिव्हिल हॉस्पिटल, अहिल्यानगर येथे दाखल केले. तेथे त्यांच्यावर उपचार करण्यात आले. उपचारानंतर देवेंद्र यांनी पोलीस ठाण्यात हजेरी लावून फिर्याद दिली. या प्रकरणी तोफखाना पोलिसांनी आदित्य लहु सकट व त्याच्या अनोळखी साथीदाराविरुद्ध मारहाण, धमकी व नुकसानप्रकरणी गुन्हा दाखल केला आहे. पुढील तपास पोहेकॉ गडाख करीत आहेत.
