तरुणांना जागतिक दर्जाचं प्रशिक्षण मिळनार, राज्यात ‘सीट्रीपलआयटी’ केंद्र उभारणीच्या कामाचा आढावा

राज्यात ‘सीट्रीपलआयटी’ केंद्र उभारणीच्या कामाचा आढावा आज आयोजित बैठकीत घेतला. राज्यातील युवकांना रोजगाराभिमुख व आधुनिक तंत्रज्ञानाधिष्ठित प्रशिक्षण मिळावं, यासाठी राज्यात प्रत्येक जिल्ह्यात ‘सेंटर फॉर इन्व्हेंशन, इनोव्हेशन, इक्युबेशन अँड ट्रेनींग’ अर्थात ‘सीट्रिपलआयटी’ केंद्र उभारण्यात यावेत. त्या दृष्टीनं तातडीनं कार्यवाही करण्याचे निर्देश बैठकीत दिले.
राज्यातील तरुणांना जागतिक दर्जाचं प्रशिक्षण मिळावं, त्यांच्यामध्ये कौशल्यवृद्धी होऊन ते रोजगारक्षम व्हावेत, यासाठी कोणतीही तडजोड करु नये. त्याकरता राज्यात प्रत्येक जिल्ह्यात किमान एक ‘सीट्रीपलआयटी’ केंद्र उभारण्यात यावं. राज्यात सध्या दहा ठिकाणी ‘सीट्रीपलआयटी’ केंद्रे मंजूर करण्यात आली आहेत. राज्यातील उर्वरित २६ जिल्ह्यांमध्येही केंद्रे उभारण्यासाठी टाटा कंपनीशी आवश्यक तो समन्वय साधून कार्यवाही तातडीनं करण्यात यावी. या केंद्राच्या माध्यमातून दरवर्षी हजारो युवकांना ‘एआय’, ऑटोमेशन, रोबोटिक्स, मशीन लर्निंग अशा अत्याधुनिक तंत्रज्ञानाचं प्रशिक्षण मिळणार आहे.
या प्रकल्पांमुळे राज्यात उद्योगांना प्रशिक्षित मनुष्यबळ उपलब्ध होणार असून नवउद्योजकांना प्रोत्साहन मिळणार आहे. तसंच प्रत्येक जिल्ह्यात उद्योगस्नेही वातावरणाची पायाभरणी होणार आहे. युवकांचे कौशल्यवर्धन, रोजगार व स्वयंरोजगारासाठी यामुळे मोठी चालना मिळणार आहे. या केंद्रांसाठी आवश्यक असणारी जागा ‘एमआयडीसी’नं द्यावी, त्याचप्रमाणे केंद्राची जागा निवडताना ती शहराच्या जवळ असावी, प्रशिक्षार्थींना सोयीची असावी, याची काळजी घेण्यात यावी. या केंद्रासाठी आवश्यक असणारा १५ टक्के निधी प्रत्येक जिल्ह्याच्या जिल्हा नियोजन समितीच्या मार्फत देण्यात येईल. याचबरोबर रायगड जिल्ह्यातील ‘सीट्रिपलआयटी’ केंद्रासाठी ‘एमआयडीसी’मार्फत निधी उपलब्ध करुन दिला जाईल, अशी सूचना बैठकीत केली.