नवरात्र उत्सवाच्या पार्श्वभूमीवर वाहतूक पर्यायी मार्गाने
जिल्हादंडाधिकारी यांनी जारी केली सुधारित अधिसूचना
अहिल्यानगर, – मोटार वाहन अधिनियम १९८८ चे कलम ११५ नुसार प्राप्त अधिकाराचा वापर करून जिल्हादंडाधिकारी डॉ. पंकज आशिया यांनी नवरात्र उत्सवाच्या पार्श्वभूमीवर २१ सप्टेंबर ते २ ऑक्टोबर २०२५ या कालावधीत पुणे-छत्रपती संभाजीनगर, मनमाड-दौंड, कल्याण-पाथर्डी हायवेवरून येणाऱ्या वाहतुकीस पर्यायी मार्गाने वळविण्याची सुधारित अधिसूचना जारी केली आहे.
छत्रपती संभाजीनगर-मनमाड या शहराकडून येऊन पुणे व कल्याणकडे जाणारी जड वाहतूक शेंडी-निंबळक-केडगाव मार्गे पुणे व कल्याण शहराकडे वळविण्यात आली आहे. तर पुण्याकडून येऊन मनमाड व छत्रपती संभाजीनगर शहराकडे जाणारी जड वाहतूक केडगाव-निंबळक-शेंडी मार्गे मनमाड व छत्रपती संभाजीनगर शहराकडे वळविण्यात आली आहे.
अहिल्यानगर शहरातील बाजारपेठेत येणाऱ्या सर्व प्रकारच्या मालवाहतुकीस (हलकी व अवजड) सकाळी ३ वाजेपासून रात्री १० वाजेपर्यंत बंदी राहील. यामध्ये सार्वजनिक वितरण व्यवस्थेतील अन्नधान्याची वाहतूक करणारी व निवडणूक कर्तव्यावरील वाहने वगळण्यात आली आहेत. मात्र, रात्री १० वाजेपासून सकाळी ३ वाजेपर्यंत जीवनावश्यक वस्तूंची वाहतूक करणाऱ्या हलक्या व अवजड वाहनांना प्रवेश दिला जाईल.
तसेच, रात्री १० वाजेपासून सकाळी ३ वाजेपर्यंतचा कालावधी वगळता इतर वेळेत अहिल्यानगर शहर हद्दीतील कोणत्याही सार्वजनिक जागांवर किंवा रस्त्याच्या आजूबाजूस हलकी व अवजड मालवाहू वाहने उभी करण्यास किंवा पार्किंग करण्यास प्रतिबंध करण्यात आला आहे.
