*अनुसूचित जाती, अनुसूचित जमाती,नागरिकांचा मागास व सर्वसाधारण प्रवर्गाकरिता सरपंच पदाच्या आरक्षणासाठी २३ एप्रिल रोजी सोडत*
अहिल्यानगर – जिल्ह्यातील तील ५ मार्च २०२५ ते ४ मार्च २०३० या कालावधीत मुदत संपणाऱ्या अनुसुचित जाती, अनुसुचित जमाती, नागरीकांचा मागास प्रवर्ग व सर्वसाधारण प्रवर्गासाठी सरपंच पदाचे आरक्षण निश्चित करण्यासाठी २३ एप्रिल २०२५ रोजी दुपारी १२ वाजता १४ तालुक्यातील तहसीलदारांनी सोडत सभा आयोजित करण्याचे निर्देश जिल्हाधिकारी डॉ.पंकज आशिया यांनी एका आदेशानुसार दिले आहेत.
तहसिलदार यांनी तालुक्यातील अनुसुचित जाती, अनुसुचित जमाती, नागरीकांचा मागास प्रवर्ग व सर्वसाधारण प्रवर्गाकरीता सरपंच पदाचे आरक्षण निश्चित केल्यानंतर उपविभागीय अधिकारी यांना एक द्वितीयांश सरपंच पदे महिला (अनुसुचित जाती महिला व अनुसुचित जमाती महिला, नागरीकांचा मागास प्रवर्ग महिला व सर्वसाधारण महिला) यांच्यासाठी महिला आरक्षण निश्चित करण्यासाठी स्वतंत्ररित्या प्राधिकृत करण्यात आले आहे. २४ एप्रिल २०२५ रोजी अकोले, जामखेड, श्रीरामपूर, कोपरगाव, शेवगाव, श्रीगोंदा व अहिल्यानगर या तालुक्यात तर २५ एप्रिल रोजी संगमनेर, कर्जत, राहुरी, राहाता, पाथर्डी, पारनेर व नेवासा या तालुक्यांमध्ये महिला आरक्षण सोडत काढण्यात येईल.
स्थानिक स्वराज्य संस्थांचे सदस्य, पदाधिकारी तसेच ग्रामपंचायतीचे सदस्य व नागरीक यांच्या उपस्थितीत आरक्षणाची कार्यवाही पूर्ण करण्यात यावी, असेही कळविण्यात आले आहे.
