छत्रपती संभाजीनगरमध्ये मृदंगाचार्य लघाणे महाराजांच्या बायकोने आत्महत्या केल्याची धक्कादायक बातमी समोर आली आहे. नवऱ्याचे अनैतिक संबंध, कौटुंबिक छळ आणि मानसिक त्रासाला कंटाळून लघाणे महाराजांच्या बायकोने टोकाचे पाऊल उचललं. राहत्या घरी गळफास घेत तिने आयुष्य संपवलं. ही घटना छपत्रपती संभाजीनगरच्या शेपू या गावात घडली. काजल लघाणे असं आत्महत्या केलेल्या महिलेचे नाव होते. या प्रकरणी काजलच्या कुटुंबीयांनी केलेल्या तक्रारीवरून लघाणे महाराजांविरोधात गुन्हा दाखल करण्याची प्रक्रिया सुरू आहे.
मिळालेल्या माहितीनुसार, जालना जिल्ह्यातील बदनापूर तालुक्यातील देवपिंपळगाव येथील आण्णासाहेब केशवराव जाधव यांची मुलगी काजलचे वर्षभरापूर्वीच २५ मार्च २०२५ रोजी छत्रपती संभाजीनगरच्या रांजणगावमधील शेपू गावामध्ये राहणाऱ्या अमोल लघाणेसोबत लग्न झाले होते. अमोल लघाणे मृदंग वाजवणारा असून मृदंगाचार्य म्हणून तो प्रसिद्ध आहे. पारंपारिक पद्धतीने त्यांचा लग्नसोहळा पार पडला होता. लग्नाला वर्ष पूर्ण होत नाही तोवरच काजलने नवऱ्याच्या छळाला कंटाळून आत्महत्या केली.
काजलने १ एप्रिल रोजी सकाळी सव्व सात वाजताच्या सुमारास राहत्या घरात गळफास घेत आत्महत्या केली. तिच्या नवऱ्याच्या कुटुंबीयांनी तिला तात्काळ घाटी रुग्णालयात नेले पण तोपर्यंत उशिर झाला होता. डॉक्टरांनी काजलला मृत घोषित केले. या घटनेमुळे संभाजीनगरमध्ये खळबळ उडाली. या घटनेची माहिती मिळताच काजच्या कुटुंबीयांनी संभाजीनगर गाठले त्यांनी अमोल लघाणेच्या त्रासाला कंटाळूनच काजलने आत्महत्या केल्याचा आरोप केला. त्यांनी अमोलविरोधात कठोर कारवाई करण्यात यावी अशी मागणी केली.
काजलच्या कुटुंबीयांनी दिलेल्या माहितीनुसार, अमोलशी लग्न झाल्यानंतर काजलचा संसार व्यवस्थित सुरू होता. या लग्नामुळे दोन्ही कुटुंबीय आनंदी होते. पण लग्नाला काही महिने पूर्ण झाल्यानंतर अमोलचे काजलसोबतचे वागणे बदलले. त्याचे बाहेर दुसऱ्या महिलेसोबत अनैतिक संबंध होते याची माहिती काजलला मिळाली होती. या कारणावरून अमोल सतत काजलला त्रास देत होता. तिचा मारहाण करायचा, शिवीगाळ करायचा आणि धमक्या द्यायचा. काजलने तिला होणाऱ्या त्रासाबद्दल आई-वडिलांना सांगितले होते. त्यांनी अमोला समजावले होते पण त्याचा त्रास काही कमी झाला नाही तो काजलला आणखी त्रास देत होता.
