नगर तालुक्यातील रुईछत्तीशी गावात जुन्या वादातून दोन कुटुंबांमध्ये झालेल्या भीषण हाणामारीत कोयता, लोखंडी रॉड आणि लाकडी बॅटने जीवघेणा हल्ला करण्यात आला. या घटनेत एकाच कुटुंबातील वृद्ध व्यक्तीसह तीन ते चार जण गंभीर जखमी झाले असून, नगर तालुका पोलीस ठाण्यात पाच आरोपींविरुद्ध गुन्हा दाखल करण्यात आला आहे.
मिळालेल्या माहितीनुसार, फिर्यादी रमजान पठाण यांना त्यांच्या घरासमोर भांडण सुरू असल्याची माहिती मिळताच त्यांनी घटनास्थळी धाव घेतली. यावेळी आरोपी जयद सादीक पठाण, समद पठाण, जुलेखा पठाण, सादीक पठाण आणि रजिया काझी यांनी फिर्यादीच्या नातेवाईकांना लाकडी बॅट, कोयता आणि लोखंडी रॉडने मारहाण करण्यास सुरुवात केली होती. या हल्ल्यात एका आरोपीने कोयत्याने वार करून फिर्यादीच्या नातेवाईकांच्या मानेवर आणि डोयावर गंभीर दुखापत केली. तसेच एका वृद्ध व्यक्तीच्या डोयातही कोयता लागल्याने ते रक्ताच्या थारोळ्यात पडले. भांडण सोडवण्यासाठी गेलेल्या फिर्यादीलाही आरोपींनी पकडून ठेवून बॅटने बेदम मारहाण केली. या गोंधळात कुटुंबातील महिलांनाही जमिनीवर पाडून लाथाबुक्क्यांनी व दगडांनी मारहाण करण्यात आली. या झटापटीत सोन्याचे दागिने गहाळ झाल्याचेही फिर्यादीत म्हटले आहे. जखमींवर अहिल्यानगर येथील जिल्हा रुग्णालयात उपचार सुरू आहेत. सहाय्यक पोलीस निरीक्षक गणेश वारुळे यांच्या मार्गदर्शनाखाली पोलीस हवालदार खरमाळे या प्रकरणाचा पुढील तपास करत आहेत.
——————————————————————————-
केडगाव परिसरातील नगर-पुणे महामार्गावर असलेल्या काकडे मळा भागात दोन अज्ञात चोरट्यांनी मध्यरात्री घरफोडी करून रोख रकमेसह सोन्याचे दागिने असा एकूण १ लाख २२ हजार रुपयांचा मुद्देमाल चोरून नेला आहे. याप्रकरणी कोतवाली पोलीस ठाण्यात गुन्हा नोंदवण्यात आला असून पोलीस आरोपींचा शोध घेत आहेत.
रामदास शंकर काकडे यांचा बांधकाम व्यवसाय असून ते ज्ञानेश्वर हॉटेलच्या मागे कुटुंबासह राहतात. १५ एप्रिल रोजी रात्री सर्व कुटुंब जेवण करून झोपले होते. फिर्यादी, त्यांची पत्नी आणि आई घरासमोरील भागात झोपले होते, तर मुलगा आणि मुलगी घरात झोपलेले होते. पहाटे पावणे पाच वाजेच्या सुमारास मुलीला जाग आली असता, दोन अनोळखी व्यक्ती तोंडाला रुमाल बांधून घरातील सामान चोरत असल्याचे तिच्या निदर्शनास आले. चोरट्यांनी घराच्या किचनमधील खिडकीचे गज कापून आत प्रवेश केला होता. घरातील बेडमधील लोखंडी कपाटाचे दरवाजे तोडून लॉकरमधील दीड तोळ्याची सोन्याची साखळी, सोन्याचे कानातील दागिने, पितळी मूर्ती आणि ४० हजार रुपयांची रोख रक्कम असा माल लंपास केला. चोरीची ही घटना लक्षात येताच परिसरात मोठी खळबळ उडाली आहे. या धाडसी चोरीप्रकरणी रामदास काकडे यांनी दिलेल्या तक्रारीवरून कोतवाली पोलिसांनी अज्ञात चोरट्यांविरुद्ध कायदेशीर गुन्हा दाखल केला आहे. भरवस्तीत झालेल्या या चोरीमुळे नागरिकांमध्ये भीतीचे वातावरण पसरले असून पोलिसांनी गस्त वाढवण्याची मागणी होत आहे.
