राज्यभरात प्रतिबंधित गुटखा आणि पानमसालाविरोधात अन्न व औषध प्रशासनाने धडक मोहीम राबवत आहे. 6 दिवासांत 203 छापे टाकण्यात आले असून यामध्ये 102 अटक करण्यात आली आहे. तर राज्यभरातील जवळपास 68 दुकानं आणि हॉटेल्स बंद करण्यात आली. आयएएस तुकाराम मुंढे यांनी नुकतीच अन्न व औषध प्रशासनाच्या आयुक्तपदाची जबाबदारी स्वीकारली. यानंतर राज्यभरात तिबंधित गुटखा-पानमसाला विक्रेत्यांविरोधातील कारवाईचा तडाखा लावण्यात आला आहे.
अन्न व औषध प्रशासन आयुक्त तुकाराम मुंढे यांनी कडक शब्दांत इशारा दिला आहे. आरोग्याशी खेळ करणाऱ्यांना सोडणार नाही, असं म्हणत कारवाई अधिक तीव्र होणार असल्याचे स्पष्ट केले आहे. तसेच आता जनतेला थेट तक्रार करण्याचं आवाहन केलं आहे. यासाठी टोल फ्री क्रमांक आणि ई-मेल आयडी शेअर करण्यात आला आहे. अन्न व औषधाबाबत किंवा गुटखा आणि पानमसालाबाबत नेमकी कुठे तक्रार करायची याची नागरिकांनी माहिती नसते. त्यामुळे आता मुंढे यांनी नागरिकांनी थेट त्यांच्याकडे तक्रार करण्यासाठी एक प्लॅटफॉर्म उपलब्ध करून दिला आहे.
अन्नातील आणि औषधातील भेसळीच्या तक्रारासाठी टोल फ्री नंबर-
टोल फ्री क्रमांक : 1800222365
ई-मेल : jc-foodhq@gov.in
अन्न आणि औषध प्रशासन विभागाचे आयुक्त तुकाराम मुंढे यांच्या मार्गदर्शनाखाली संपूर्ण राज्यभरात धडक कारवाया करण्यात येत असून या पार्श्वभूमीवर 4 मे रोजी धुळे जिल्ह्यात अन्न औषध प्रशासन विभागाने महाराष्ट्रात प्रतिबंधित असलेला गुटखा आणि तंबाखूजन्य पदार्थांची वाहतूक रोखली असून या कारवाईत तब्बल 18 लाख 50 हजार रुपयांचा गुटखा आणि तंबाखूजन्य पदार्थांचा साठा जप्त करण्यात आला आहे. मुंबई आग्रा हा मार्गावरून या गुटख्याची वाहतूक होत असल्याची माहिती अन्न औषध प्रशासन विभागाला मिळाली होती. या माहितीच्या आधारे अन्न औषध प्रशासन विभागाने तब्बल 18 लाख 50 हजार रुपयांचा मुद्देमाल जप्त केला असून याप्रकरणी चालक सुरेश कुमार गोवरिया राहणार राजस्थान यांच्याविरुद्ध गुन्हा दाखल करण्यात आला आहे.
