पालघर जिल्हाधिकारी कार्यालयात महसूल सहाय्यक म्हणून कार्यरत असलेल्या २७ वर्षीय स्नेहल सावंत यांची गेल्या तीन महिन्यांपासून सुरू असलेली मृत्यूशी झुंज अखेर अपयशी ठरली. पुण्यातील रुग्णालयात उपचार सुरू असताना काल संध्याकाळी उशिरा त्यांचा मृत्यू झाल्याची माहिती समोर आली आहे. या घटनेने पालघर जिल्ह्यात हळहळ व्यक्त होत असून, आरोपीवर कठोर कारवाईची मागणी होत आहे.
मिळालेल्या माहितीनुसार, १३ जून रोजी पालघर शहरातील गोल्ड सिनेमा परिसरात कामावरून सुटल्यानंतर घरी जात असताना स्नेहल सावंत यांच्यावर धारदार कोयत्याने जीवघेणा हल्ला करण्यात आला होता. प्रेमसंबंधातून त्यांचा प्रियकर अमोल मुळे याने हा हल्ला केल्याचा आरोप आहे. अमोल मुळेने स्नेहल यांच्या मानेसह शरीराच्या विविध भागांवर धारदार शस्त्राने सपासप वार केले होते. या संपूर्ण घटनेचे सीसीटीव्ही फुटेजही समोर आले होते.
हल्ल्यात स्नेहल सावंत गंभीर जखमी झाल्या होत्या. घटनेनंतर त्यांना तातडीने बोईसर येथील एका खासगी रुग्णालयात दाखल करण्यात आले. मात्र, प्रकृती चिंताजनक असल्याने पुढील उपचारांसाठी त्यांना पुण्यातील रुग्णालयात हलवण्यात आले होते. डॉक्टरांकडून त्यांच्यावर उपचार सुरू होते. गेल्या तीन महिन्यांपासून त्या मृत्यूशी झुंज देत होत्या. मात्र, अखेर उपचारादरम्यान त्यांची प्राणज्योत मालवली.
दरम्यान, हल्ल्यानंतर फरार झालेल्या अमोल मुळे याचा पालघर पोलिसांच्या स्थानिक गुन्हे शाखेने शोध घेत त्याला अटक केली होती. या प्रकरणाचा पुढील तपास पोलिसांकडून सुरू आहे. स्नेहल सावंत यांच्या मृत्यूची बातमी समोर आल्यानंतर पालघरमध्ये शोककळा पसरली आहे. एका तरुण महिला कर्मचाऱ्याचा अशा प्रकारे मृत्यू झाल्याने नागरिकांमध्ये संतापाचे वातावरण आहे. या प्रकरणातील आरोपीवर कठोरात कठोर कारवाई करण्यात यावी आणि स्नेहल सावंत यांच्या कुटुंबाला न्याय मिळावा, अशी मागणी होत आहे.
