नगर : अल्पवयीन मुलीवर अत्याचार केल्याच्या गुन्ह्यात न्यायालयाने खासगी क्लासेस चालविणाऱ्या शिक्षकास दोषी धरत 20 वर्षे सक्त मजुरी व 13 हजार रुपये दंडाची शिक्षा सुनावली.
विशाल लक्ष्मण बारगळ (वय 28, रा.बोल्हेगाव,अहिल्यानगर, मूळ रा.रस्तापूर,नेवासा) असे खासगी क्लासेसच्या शिक्षकाचे नाव आहे.
अधिक माहिती अशी, 18 ऑगस्ट 2018 रोजीचे सकाळी पीडित मुलगी (वय 14) ही आरोपीच्या खासगी स्पोकन इंग्लिश क्लासमध्ये शिकवणीसाठी गेली असता, आरोपीने पीडितेशी बळजबरीने शरीर संबंध व अनैसर्गिक शारीरिक संबंध केला. याबाबतचा तोफखाना पोलिस ठाण्यात गुन्हा दाखल करण्यात आला. पोलिसांनी गुन्ह्याचा तपास करून दोषारोपपत्र न्यायालयात सादर केले. या खटल्यात सरकार पक्षातर्फे सात साक्षीदार तपासण्यात आले.
अल्पवयीन पीडित मुलगी, पालक, वैद्यकीय अधिकारी व तपासी अधिकारी पोलिस उपअधीक्षक संदीप मिटके यांची साक्ष महत्त्वपूर्ण ठरली. न्यायालयाने सरकार पक्षाचा युक्तिवाद व पुरावे ग्राह्यधरून विशेष जिल्हा व सत्र न्यायाधीश डॉ. यु. जे. मोरे यांनी विविध कलमान्वये वरीलप्रमाणे शिक्षा ठोठावली. सरकारतर्फे अतिरिक्त सरकारी अभियोक्ता अनंत चौधरी व कोमल राठोड यांनी बाजू मांडली.
