महाराष्ट्राच्या राजकारणातून मोठी बातमी समोर आली आहे. राष्ट्रवादी काँग्रेस शरद पवार गटाचे नेते एकनाथ खडसे यांच्या भाजपमधील घरवापसीच्या चर्चांना पुन्हा एकदा वेग आला आहे. एकनाथ खडसे यांनी भाजपचे राष्ट्रीय सरचिटणीस विनोद तावडे यांची भेट घेतली. मुंबईत या दोघांची भेट झाली असून बराच वेळ चर्चा झाली. या भेटीनंतर एकनाथ खडसे भाजपमध्ये जाणार असल्याच्या चर्चा सुरू झाल्या आहेत. या भेटीनंतर राजकारणात अनेक तर्क-वितर्क लावले जात आहेत.
भाजपचे दिग्गज नेते विनोद तावडे यांनी आमदार एकनाथ खडसे यांची भेट घेतल्याने राज्याच्या राजकारणात पुन्हा मोठा भूकंप येणार असल्याची चर्चा होऊ लागली आहे. त्यांच्या भेटीचे फोटो देखील समोर आले असून ते व्हायरल होत आहेत. या भेटीनंतर एकनाथ खडसे यांची भेट झाल्याच्या वृत्ताला दुजोरा दिला आहे. आता एकनाथ खडसे हे लवकरच मोठा राजकीय निर्णय घेणार असल्याच्या चर्चेला उधाण आले असतांनाच आता एका भेटीमुळे याला मोठे बळ लाभले आहे.
दरम्यान, या संदर्भातील नेमकी माहिती जाणून घेण्यासाठी प्रतिनिधीने एकनाथ खडसे यांच्याशी संपर्क साधला असता त्यांनी ही भेट झाल्याच्या वृत्ताला दुजोरा दिला आहे. ते म्हणाले की, विनोद तावडे हे रक्षा खडसे यांची भेट घेण्यासाठी माझ्या मुंबई येथील निवासस्थानी आले होते. तेव्हा त्यांनी माझी देखील भेट घेत प्रकृतीची विचारपूस केली. तसेच या भेटीत कोणतीही राजकीय चर्चा झाली नसून वैयक्तीक वार्तालाप झाला ! असे आमदार खडसे म्हणाले.
एकनाथ खडसे आणि विनोद तावडे यांच्या भेटीमुळे उत्तर महाराष्ट्रातील राजकारणात मोठा बदल होण्याची चर्चा होत आहे. या भेटीमागे उत्तर महाराष्ट्रातील भाजपचे संकटमोचक गिरीश महाजन यांचा प्रभव कमी करण्याची दिल्लीतून खेळी तर केली जात नाही ना अशा देखील उलट-सुलट चर्चा होऊ लागल्या आहेत. गिरीश महाजन यांचा वाढता प्रभाव कमी करण्यासाठी केंद्रीय नेतृत्वाची ही चाल असल्याचे देखील बोलले जात आहे.
