राष्ट्रवादी युवक काँग्रेसचे सरचिटणीस ओंकार हजारे यांच्या आत्महत्येप्रकरणी मोठी कारवाई करण्यात आली आहे. या प्रकरणी राष्ट्रवादी काँग्रेस शरद पवार गटाचे माजी उपमहापौर नाना काळे यांच्यासह सात जणांविरोधात गुन्हा दाखल करण्यात आला. या प्रकरणी ओंकार हजारेच्या भावाने पोलिस ठाण्यात तक्रार दाखल केली होती. या तक्रारीनंतर ७ जणांविरोधात गुन्हा दाखल करण्यात आला आहे. मिळालेल्या माहितीनुसार, राष्ट्रवादी अजित पवार पक्षाच्या युवक नेत्याच्या आत्महत्या प्रकरणी माजी उपमहापौर, त्याच्या पत्नीसह सात जणांविरोधात फौजदार चावडी पोलिस ठाण्यात गुन्हा दाखल करण्यात आला आहे. ८ जून रोजी कोणाला न सांगता ओंकार हजारे हे घराबाहेर पडले होते.मात्र बराच वेळ घरी न आल्यामुळे कुटुंबीयांनी त्यांचा शोध घेण्यास सुरूवात केली. शोध घेतल्यानंतर सुपर मार्केट येथे ओंकार हजारे हा कारमध्ये बेशुद्ध अवस्थेत दिसून आला.
ओंकार यांच्या कुटुंबीयांनी त्यांना तात्काळ रुग्णालयात नेले पण डॉक्टरांनी त्यांना मृत घोषित केले होते. ओंकार हजारे हा अजित पवार राष्ट्रवादी युवक काँग्रेस सरचिटणीस म्हणून कार्यरत होते. ओंकार हजारे यांच्या आत्महत्याप्रकरणी माजी उपमहापौर नाना काळे, पत्नी स्वाती हजारे, ज्ञानेश्वर पवार, जयश्री पवार, मंगेश पवार, निखिल बनसोडे, ओम घाडगे यांच्याविरोधात गुन्हा दाखल करण्यात आला आहे.
ओंकार आणि स्वाती यांचा २०१९ साली प्रेम विवाह झाला होता. स्वातीच्या कुटुंबीयांचा प्रेम विवाहला विरोध होता. ओंकारला त्यामुळे स्वातीचे कुटुंबीय त्रास देत होते. सासरची मंडळी आणि माजी उपमहापौर नाना काळे त्रास देत असल्याचा समाज माध्यमांवर स्टेटस ८ जून रोजी ओंकारने ठेवला होता. स्वाती ओंकारकडे घटस्फोट मागत होती. त्यासाठी सासरची मंडळी आणि नाना काळे त्रास देत असल्यामुळेच आत्महत्या केल्याच्या कारणावरून सात जणांविरोधात गुन्हा दाखल करण्यात आला.
