समता पतसंस्थेचे संस्थापक काका कोयटे यांचा राजीनामा; कोयटे म्हणाले मी भोंदू खरातचा भक्त नाही

नाशिकचा भोंदू बाबा अशोक खरातची वेगवेगळ्या प्रकरणांमध्ये सखोल चौकशी सुरू आहे. याआधी अनेक नेते आणि महत्त्वाच्या पदावरील व्यक्ती अशोक खरातच्या संपर्कात होते अशी माहिती समोर आलेली आहे. महिलांचे लैंगिक शोषण करण्यासह अशोक खरातने भोंदुगिरी आणि आर्थिक गैरव्यवहार केल्याचे समोर आले आहे. समता पतसंस्थेचे संस्थापक काका कोयटे यांनी राज्य पतसंस्था फेडरेशनच्या अध्यक्षपदाचा राजीनामा दिला आहे. गेल्या अनेक वर्षांपासून काका कोयटे फेडरेशनचे अध्यक्ष होते, मात्र काही दिवसांपूर्वी भोंदू अशोक खरात याचे समता पतसंस्थेशी कनेक्शन समोर आल्यानंतर सभासदांकडून राजीनाम्याची मागणी करण्यात आल्याची चर्चा समोर आली होती, त्यानंतर आता त्यांनी आपले पद सोडण्याचा निर्णय घेतला आहे.राज्य पतसंस्था फेडरेशच्या अंतर्गत राज्यातील 15 हजार पतसंस्था काम करतात. 6 हजार सभासद असलेल्या या फेडशनचे कोयटे 2015 च्या पूर्वीपासून अध्यक्ष होते. मात्र काही दिवसांपूर्वी अशोक खरात आणि समता परिषदेचे संबंध असल्याचे समोर आले होते, त्यामुळे त्यांच्यावरील दबाव वाढला होता, त्यामुळेच आता काका कोयटे पतसंस्था फेडरेशनच्या अध्यक्षपदावरून पायऊतार झाले आहेत.

समता पतसंस्थेत अशोक खरात तब्बल 100 खात्यांना नॉमिनी असल्याचे समोर आले होते, या खात्यांमधून कोट्यवधींचे व्यवहार झाल्याचे समोर आले होते. तसेच काका हे खरातचे भक्त असल्याचा आरोप झाला होता. त्यावेळी बोलताना काका कोयटे यांनी म्हटले होते की, मी भोंदू खरातचा भक्त नाही, कोणत्याही भोंदूशी माझा संबंध नाही. नाशिकच्या पतसंस्था फेडरेशनच्या कार्यक्रमात खरात होता एवढच. समता पतसंस्थेमध्ये भोंदू अशोक खरात नॉमीनी असलेल्या खात्यांची केवायसी करूनच ते उघडण्यात आले. जास्त खाती कोविड काळात ऑनलाईन उघडण्यात आली होती. जे खातेदार म्हणतायत आमचा संबंध नाही त्याचे पुरावे पोलिसांना देऊ असं स्पष्टीकरण काका कोयटे यांनी दिले आहे.