भारतीय क्रिकेट संघाचा अनुभवी सलामीवीर रोहित शर्माच्या आंतरराष्ट्रीय कारकिर्दीबाबत मोठी चर्चा सुरू झाली आहे. इंग्लंडविरुद्ध लॉर्ड्स येथे होणारा तिसरा आणि निर्णायक वनडे सामना हा रोहित शर्माचा भारताकडून अखेरचा आंतरराष्ट्रीय सामना ठरू शकतो, असा दावा विविध माध्यमांच्या अहवालांमध्ये करण्यात आला आहे.
अहवालानुसार, भारतीय निवड समितीने 2027 च्या वनडे विश्वचषकाच्या दृष्टीने नव्या खेळाडूंना संधी देण्याचा निर्णय घेतला असून, रोहित शर्मा भविष्यातील योजनांचा भाग नसल्याचे त्याला कळवण्यात आल्याचे सांगितले जात आहे. त्यामुळे इंग्लंडविरुद्धची सध्याची वनडे मालिका त्याच्या आंतरराष्ट्रीय कारकिर्दीतील अखेरची मालिका ठरू शकते.दरम्यान, कार्डिफ येथे झालेल्या दुसऱ्या वनडेमध्ये रोहितला मोठी खेळी करता आली नाही. रोहित शर्माने 26 धावा केल्या आणि भारतालाही चार विकेट्सनी पराभव स्वीकारावा लागला. या पराभवानंतर मालिकेत 1-1 अशी बरोबरी झाली असून आता लॉर्ड्सवरील तिसरा वनडे निर्णायक ठरणार आहे. मात्र, रोहित शर्माच्या निवृत्तीबाबत किंवा त्याला संघाबाहेर करण्याबाबत बीसीसीआयकडून अद्याप कोणतीही अधिकृत घोषणा करण्यात आलेली नाही. त्यामुळे सध्या सुरू असलेली चर्चा ही विविध वृत्तसंस्थांच्या अहवालांवर आधारित असून अधिकृत पुष्टीची प्रतीक्षा आहे.
पीटीआयच्या वृत्तानुसार, मुख्य प्रशिक्षक गौतम गंभीर आणि निवड समितीचे अध्यक्ष अजित आगरकर हे विराट कोहलीबाबत एकमत आहेत. कोहलीची सध्याची उत्कृष्ट फॉर्म आणि तंदुरुस्ती लक्षात घेता, विराट कोहली वनडे संघात आपोआप निवड होण्याचा प्रबळ दावेदार मानला जात आहे.
