अहिल्यानगर-राहता आजीसोबत आनंदाने डफचा खेळ पाहण्यासाठी निघालेल्या 13 वर्षीय ओमकार गायकवाडचा कारच्या धडकेत दुर्दैवी मृत्यू झाला. मात्र हा केवळ अपघात नसून, चालकाने जाणीवपूर्वक कार पुन्हा रिव्हर्स घेऊन ओमकारच्या अंगावर घातल्याचा गंभीर आरोप नातेवाईकांनी केला आहे. या घटनेनंतर राहाता शहरात संतापाची लाट उसळली होती. याप्रकरणी पोलिसांनी तीन जणांना अटक केली असून १ जण फरार आहे. पोलीस या घटनेचा तपास करत आहेत.
मिळालेल्या माहितीनुसार, ही घटना ८ मे रोजी रात्री साडेनऊ वाजेच्या सुमारास घडली. ओमकार आपल्या आजीसोबत राहाता शहरातील शनी चौक परिसरात डफचा खेळ पाहण्यासाठी जात होता. कृष्ण मंदिराजवळील वळणावर अचानक भरधाव वेगाने आलेल्या इटिंगा कारने आधी आजीला आणि नंतर ओमकारला जोरदार धडक दिली. धडकेनंतर ओमकार रस्त्यावर कोसळला. प्रत्यक्षदर्शी आणि कुटुंबियांच्या दाव्यानुसार, ओमकार खाली पडल्यानंतर कार चालकाने माणुसकीला काळिमा फासत गाडी पुन्हा मागे पुढे घेऊन त्याच्या पोटावरून चाक फिरवले.
या घटनेत गंभीर जखमी झालेल्या ओमकारला तातडीने शिर्डी येथील रुग्णालयात दाखल करण्यात आले. प्रकृती चिंताजनक असल्याने त्याला पुढील उपचारासाठी नाशिक येथे हलवण्यात आले होते. मात्र उपचार सुरू असतानाच काल सकाळी त्याचा मृत्यू झाला आहे. ओमकारच्या मृत्यूची बातमी समजताच कुटुंबियांनी आणि ग्रामस्थांनी तीव्र संताप व्यक्त केला.
आरोपींना तत्काळ अटक करण्यात यावी या मागणीसाठी नागरिकांनी ओमकारचा मृतदेह थेट राहाता पोलीस ठाण्यासमोर आणून ठिय्या आंदोलन केले. काही काळ परिसरात तणावपूर्ण वातावरण निर्माण झाले होते. घटनेची गंभीर दखल घेत वरिष्ठ पोलीस अधिकारी राहाता येथे दाखल झाले. त्यानंतर तपासाला वेग देत पोलिसांनी या प्रकरणातील तीन आरोपींना ताब्यात घेतले असून एक आरोपी अद्याप फरार आहे.
दरम्यान, ताब्यात घेतलेल्या आरोपींपैकी काहींवर यापूर्वीही गंभीर स्वरूपाचे गुन्हे दाखल असल्याची माहिती समोर आली आहे. पोलिसांनी आरोपींविरोधात सदोष मनुष्यवधाचा गुन्हा दाखल केला असून पुढील तपास सुरू आहे. उपविभागीय पोलीस अधिकारी अमोल भारती यांनी जमावाला शांत करत परिस्थिती नियंत्रणात आणली. त्यानंतर शोकाकुल वातावरणात ओमकारवर अंत्यसंस्कार करण्यात आले.
