शिवसेना शिंदे गटाचे आमदार भरत गोगावले यांनी विधानसभा निवडणुकीपूर्वी घरामध्ये अघोरी पूजा केली होती. याचा व्हिडीओ समोर आला होता. यावरून भरत गोगावले यांच्यावर विरोधकांकडून सडकून टीका होत आहे. शिवसेना ठाकरे गटाचे खासदार संजय राऊत यांनी देखील भरत गोगावले यांनी घरी केलेल्या अघोरी पूजेवर प्रतिक्रिया देत त्यांच्यावर सडकून टीका केली. महाराष्ट्राला काळीम फासणारी ही कृती असल्याचे मत संजय राऊत यांनी व्यक्त केले.
भरत गोगावले यांच्यावर टीका करताना संजय राऊत यांनी सांगितले की, ‘महाराष्ट्राला काळीम फासणारी ही कृती आहे. अंधश्रद्धेविरुद्ध महाराष्ट्राने कायम लढा दिला. देवेंद्र फडणवीस राज्याचे मुख्यमंत्री आहेत मंत्र्यांचे पीए जसे ते तपासून घेतात तसे त्यांनी मंत्री देखील तपासून घेतले पाहिजेत. आघोरी नेते असलेले मंत्री महाराष्ट्राचा काय भलं करणार. याबद्दल जास्त माहिती द्यायची तर राज्याच्या मुख्यमंत्र्यांना एलिमिनेट करून तिथे आमचा नेता यावा यासाठी अघोरी विद्येचे प्रकार शिदे गटाची लोक करतायेत.’
संजय राऊत यांनी पुढे सांगितले की, ‘माझा विश्वास नाही तरी हे समोर येतंय. जनतेच्या कल्याणाचे यांना काही पडलेलं नाही. लोकशाहीशी यांना काही पडलेलं नाही. मुख्यमंत्रीपदावर बसलेल्या व्यक्तीला एलिमिनेट करणे तसा शिंदे गटाच्या मंत्र्यांना या आघाडी उपक्रमाद्वारे भाजपाच्या प्रमुख नेत्यांना एलिमिनेट करायचं आहे. व्हिडिओ समोर आले आहेत. ते त्यासाठीच सुरू आहेत हे वेगवेगळ्या भागात सुरू आहे. साताऱ्यापासून महाडपर्यंत महाडपासून सावंतवाडी बेळगावपर्यंत प्रत्येक ठिकाणी हेच सुरू आहे.’
