गेल्या काही दिवसांपासून सोशल मीडियावर आपल्या डान्सने प्रेक्षकांना वेड लावणारी ऐश्वर्या जाधव पुन्हा एकदा चर्चेत आली आहे. ढोरे वस्ती, केसनंद येथे आयोजित करण्यात आलेल्या छाया ग्रुप केसनंद दहीहंडी महोत्सवात प्रसिद्ध नृत्यांगना ऐश्वर्या जाधवच्या लावणी कार्यक्रमाला पोलिसांनी परवानगी नाकारली आहे. लावणी कार्यक्रमादरम्यान अश्लील हावभाव होऊन धार्मिक तसेच सामाजिक तेढ निर्माण होण्याची शक्यता असल्याचे कारण पोलिसांनी दिले आहे.
निखिल तानाजी ढोरे यांच्या आयोजनाखाली ढोरे वस्ती, केसनंद येथे दहीहंडी महोत्सवाचे आयोजन करण्यात आले होते. या महोत्सवात नृत्यांगना ऐश्वर्या जाधव हिच्या लावणी कार्यक्रम आयोजित करण्याचे नियोजन करण्यात आले होते. मात्र, कार्यक्रमासाठी पोलिसांकडे परवानगी मागण्यात आल्यानंतर पोलिसांनी ती नाकारली.पोलिसांनी परवानगी नाकारताना लावणीच्या सादरीकरणादरम्यान अश्लील हावभाव होण्याची शक्यता असल्याचे नमूद केले आहे. तसेच अशा प्रकारच्या सादरीकरणामुळे धार्मिक किंवा सामाजिक तेढ निर्माण होण्याची शक्यता असून, कार्यक्रमस्थळी उपस्थित महिलांच्या मनात लज्जेची भावना निर्माण होऊ शकते अशी शक्यताही पोलिसांनी व्यक्त केली आहे.
याशिवाय अशा परिस्थितीत कार्यक्रमस्थळी कायदा आणि सुव्यवस्थेचा प्रश्न निर्माण होण्याची शक्यता असल्याचे पोलिसांच्या परवानगी नाकारण्याच्या कारणांमध्ये नमूद करण्यात आले आहे. त्यामुळे संभाव्य अनुचित प्रकार टाळण्यासाठी आणि सार्वजनिक शांतता व सुव्यवस्था अबाधित ठेवण्यासाठी लावणी कार्यक्रमास परवानगी देण्यात आलेली नाही.दहीहंडी महोत्सवाच्या पार्श्वभूमीवर मोठ्या संख्येने नागरिक कार्यक्रमस्थळी उपस्थित राहण्याची शक्यता असते. त्यामुळे सांस्कृतिक कार्यक्रमांचे आयोजन करताना कायदा व सुव्यवस्थेचा विचार करून पोलिसांकडून परवानगी दिली जाते. कार्यक्रमाच्या स्वरूपामुळे कोणताही अनुचित प्रकार घडण्याची शक्यता असल्यास प्रशासनाकडून आवश्यक ती खबरदारी घेतली जाते.
