अहिल्यानगर: काळीजादू करून पैशांचा पाऊस पाडतो असे आमिष दाखवून ५.५ लाख रुपयांची फसवणूक केली तसेच अल्पवयीन पिडीतेवर अत्याचार केल्याच्या आरोपावरून जिल्हा सत्र न्यायालयाने महादेवनाथ बाबा उर्फ ज्ञानदेव तुकाराम कांबळे (वय ४२, शिर्सुफळ, आटोळेवस्ती, बारामती, पुणे) यास विविध कलमान्वये दोषी धरून १० वर्षे सक्तमजुरी, ४३ हजार रुपये दंड व दंड न भरल्यास कैद अशी शिक्षा ठोठावली.
सध्या अहिल्यानगर जिल्ह्यात भोंदूबाबांचे पेव फुटले आहे. गुन्हेही दाखल झाले आहेत. या पार्श्वभूमीवर हा निकाल महत्त्वाचा मानला जातो. जिल्हा सत्र न्यायाधीश श्रीमती एम. एस. भदाणे यांनी या खटल्याचा निकाल दिला. सरकारतर्फे अतिरिक्त सरकार अभियोक्ता अनिल ढगे यांनी युक्तिवाद केला. या गुन्ह्याचा तपास पारनेर पोलीस ठाण्यातील तत्कालीन उपनिरीक्षक एच. एन. उगले यांनी केला व दोषारोपपत्र दाखल केले होते. खटल्याच्या सुनावणीत पोलीस उपनिरीक्षक संजय चव्हाण, पैरवी अधिकारी आर. डी. अडसूळ यांनी मदत केली.
पारनेर तालुक्यात घडलेल्या या गुन्ह्याची पार्श्वभूमी अशी, महादेवनाथ बाबा याने पीडिता व तिच्या वडिलांना तो देवऋषी असून काही अडचण असल्यास, भविष्य पाहून त्याचे निवारण करतो असे भासवून घरातील लोकांचे आजारपण दूर करण्यासाठी, त्यांच्या मेंढ्या मरू न देण्यासाठी होमहवन करावा लागेल. तुमच्यावर लोकांनी करणी केली आहे.त्यासाठी विधी करावा लागेल, असे सांगून तसेच पिडीता सतत आजारी पडत असल्याने तिला बरे करण्यासाठी पूजा करावी लागेल असे आमिष दाखवून पूजा करण्यासाठी व पैशाचा पाऊस पाडण्यासाठी पीडितेच्या वडिलांकडून ५ लाख ५० हजार रुपये स्वीकारून आर्थिक शोषण व फसवणूक केली तसेच नोव्हेंबर २०२० मध्ये पिडीतेच्या घरात कोणी नाही, असे पाहून विनयभंग केला व डिसेंबर २०२० मध्ये पिडीतेला दमदाटी करून एअरगनचा धाक दाखवून तिच्यावर लैंगिक अत्याचार केले, पूजेसाठी काढलेल्या फोटोचा गैरवापर करून तिला ब्लॅकमेल करून, तू माझी पत्नी आहेस, तू माझ्या घरी नांदायला ये नाहीतर तुमच्या घरावर जादूटोणा करून, तुमचे घर उध्वस्त करून टाकेल अशी धमकी दिली.
