मुंबई-गोवा महामार्गावरील अपघातांचे सत्र थांबण्याचे नाव घेत नसतानाच शनिवारी (दि. 30) दुपारी पोलादपूरजवळ झालेल्या भीषण अपघातात पाथर्डी तालुक्यातील (जि. अहिल्यानगर) मायलेकीचा जागीच मृत्यू झाला, तर बापलेक गंभीर जखमी झाले. रस्त्याच्या कडेला उभ्या असलेल्या कंटेनरवर भरधाव कार आदळल्याने हा अपघात घडला.
अहिल्यानगर जिल्ह्यातील निवडुंगे (ता. पाथर्डी) येथील मूळ रहिवासी तथा दापोली (जि.रत्नागिरी) येथील डॉ.बाळासाहेब सावंत कोकण कृषी विद्यापीठात अधीक्षक पदावर कार्यरत असलेले अनिल रावसाहेब मरकड हे पत्नी सुवर्णा मरकड, मुलगी अनुश्री मरकड व मुलगा चिन्मय मरकड यांच्यासह सुट्टीनिमित्त गावी आले होते.
शनिवारी सकाळी निवडुंगे येथून ते कुटुंबासह कारमधून (एमएच 08 एएन 2439) दापोलीकडे जात होते. दुपारी तीनच्या सुमारास पोलादपूरजवळ त्यांच्या कारची रस्त्याच्या कडेला उभ्या असलेल्या कंटेनरला (एमएच 04 एलवाय 1638) जोरदार धडक बसली. धडक इतकी भीषण होती की कारचा अक्षरशः चेंदामेंदा झाला.
या अपघातात अनिल मरकड यांच्या पत्नी सुवर्णा (वय 45) आणि मुलगी अनुश्री (वय 16) यांचा जागीच मृत्यू झाला. अनिल मरकड (वय 44) आणि त्यांचा पाच वर्षांचा मुलगा चिन्मय गंभीर जखमी झाले असून, अनिल यांना उपचारासाठी मुंबईला नेण्यात आले, तर चिन्मयवर महाड येथे उपचार सुरू आहेत.
अनिल मरकड यांचे वडील रावसाहेब राजाराम मरकड व आई मुक्ताबाई मरकड हे निवडुंगे येथे वास्तव्यास आहेत. सुवर्णा मरकड या रत्नागिरी जिल्ह्यातील स्टेट बँकेत कार्यरत होत्या.
