मुंबई- सेक्सटॉर्शन आणि जबरदस्तीने खंडणी उकळल्याप्रकरणी जम्मू-कश्मीरमधील महिला क्रिकेटर फरखंदा खान हिला मुंबई क्राइम ब्रांचने अटक केली आहे. या कारवाईत तिचा भाऊ बाजिल खान यालाही ताब्यात घेण्यात आले असून, दोघांना नवी दिल्लीतील एका हॉटेलमधून पकडण्यात आले. तसेच या प्रकरणातील तिसरा आरोपी उद्दीन इम्तियाज वानी याला श्रीनगरमधून अटक करण्यात आली आहे. या घटनेने क्रीडाक्षेत्रात खळबळ उडाली आहे.
मिळालेल्या माहितीनुसार, फिर्यादी हा कुलाबा परिसरातील व्यावसायिक आहे. त्याची ओळख २०२४ मध्ये फरखंदा खानसोबत झाली होती. सुरुवातीला दोघांमध्ये मैत्री वाढली. हळूहळू चॅटिंगद्वारे त्यांचं बोलणं होऊ लागलं. मात्र, नंतर आरोपीने अश्लील स्वरूपाचे चॅटिंग करून व्यावसायिकाला जाळ्यात ओढले आणि त्यानंतर पैशांची मागणी सुरू केली.
व्यवसायिकाने सुरुवातीला पैसे देण्यास नकार दिला, परंतु फरखंदा आणि तिच्या साथीदारांनी फिर्यादीला धमकावत, “पैसे न दिल्यास खासगी चॅट आणि फोटो सोशल मीडियावर व्हायरल करू,” अशी धमकी दिली. या भीतीमुळे फिर्यादीने ३० एप्रिल २०२४ ते १३ जानेवारी २०२६ या कालावधीत तब्बल ३२ व्यवहारांद्वारे एकूण २३.६१ लाख रुपये आरोपींच्या खात्यात ट्रान्सफर केले.
सतत येणाऱ्या धमक्यांचा दबावाखाली येऊन जानेवारी २०२६ मध्ये फिर्यादी व्यवसायिकाने आरोपींच्या खात्यात आणखी ४० लाख रुपये जमा केल्याचे समोर आले आहे. या संपूर्ण व्यवहाराची सुरुवात एप्रिल २०२४ मध्ये केवळ २० हजार रुपयांपासून झाली होती, मात्र पुढे हा आकडा लाखोंमध्ये पोचला.
याप्रकरणी व्यवसायिकाने हिंमतीने पोलीस ठाणे गाठत सदर महिला आणि तिच्या साथीदारांविरोधात गुन्हा दाखल केला. घटनेची गांभीर्यता लक्षात घेऊन पोलिसांनी म्मू-कश्मीरमधील महिला क्रिकेटर फरखंदा खान आणि तिच्या दोन साथीदारांना अटक केली आहे. मुंबई क्राइम ब्रांचकडून पुढील तपास सुरू आहे. आरोपींच्या इतर संभाव्य गुन्ह्यांचाही तपास करण्यात येत आहे.
