अहिल्यानगर शहरात शोरूममध्ये महिला कर्मचाऱ्यावर हल्ला;आरोपी महिलेने टाकला खाकीवर हात

शोरूममध्ये महिला कर्मचाऱ्यावर हल्ला; कपडे फाडून विनयभंग
कोतवालीत गुन्हा दाखल; आरोपी महिलेने धरली पोलीसांची गचंडी
अहिल्यानगर (प्रतिनिधी)- केडगाव औद्योगिक परिसरातील चारचाकी वाहनाच्या शोरूममध्ये कार्यरत असलेल्या महिला एचआर मॅनेजरवर शोरूममध्ये घुसून शिवीगाळ, मारहाण तसेच कपडे फाडून विनयभंग केल्याची धक्कादायक घटना घडली आहे. याप्रकरणी कोतवाली पोलीस ठाण्यात गुन्हा दाखल करण्यात आला असून पुढील तपास सुरू आहे.
37 वर्षीय महिला केडगाव औद्योगिक क्षेत्रातील चारचाकी वाहनाच्या शोरूममध्ये मागील सहा वर्षांपासून एचआर मॅनेजर म्हणून कार्यरत आहेत. सन 2024 मध्ये शोरूममध्ये कार्यरत असलेल्या वर्षा अभय चुतर यांना कामातील त्रुटींमुळे सेवेतून कमी करण्यात आले होते. त्यानंतर त्या वारंवार फिर्यादी महिला व शोरूम व्यवस्थापनाविरोधात शिवीगाळ करत असल्याची तक्रार यापूर्वीही देण्यात आली होती.
फिर्यादीनुसार, दि. 15 जून 2026 रोजी दुपारी सुमारे 4 वाजण्याच्या सुमारास वर्षा चुतर या वासन टोयोटा शोरूममध्ये आल्या. त्यांनी फिर्यादी महिलेला अश्‍लील व अपमानास्पद शब्दांत शिवीगाळ करण्यास सुरुवात केली. यावेळी त्यांनी शोरूममधील कर्मचाऱ्यांसमोर बदनामीकारक वक्तव्ये केल्याचा आरोप फिर्यादीने केला आहे. घटनेची माहिती मिळताच फिर्यादी महिलेने आपल्या पतीस शोरूममध्ये बोलावून घेतले. त्यांनी जाब विचारल्यानंतर आरोपी महिलेने त्यांचे कपडे फाडून शिवीगाळ केल्याचे फिर्यादीत नमूद करण्यात आले आहे. तसेच मध्यस्थी करण्यासाठी गेलेल्या फिर्यादी महिलेलाही हाताने मारहाण करण्यात आली. त्यानंतर आरोपीने त्यांचा परिधान केलेला टॉप फाडून सार्वजनिक ठिकाणी त्यांचा विनयभंग केल्याचा गंभीर आरोप करण्यात आला आहे.
–
आरोपी महिलेने टाकला खाकीवर हात
वर्षा चुतर या वाहनाच्या शोरुममध्ये येऊन शिवीगाळ करत असल्याने 112 नंबरवर फोन करुन तक्रार करण्यात आली होती. घटनास्थळी दाखल झालेल्या पोलीसांनी हा वाद मिटवण्याचा प्रयत्न करत असताना, आरोपी महिलेने थेट पोलीसांची गचंडी धरुन शिवीगाळ केल्याचा संतापजनक प्रकार घडला. हा प्रकार सध्या सोशल मीडियावर व्हायरल होत आहे.