अहिल्यानगर जिल्ह्यातील शासकीय वैद्यकीय महाविद्यालय शहरातच स्थापन व्हावे यासाठी आज मुख्यमंत्री देवेंद्र फडणवीस व उपमुख्यमंत्री अजितदादा पवार यांची विधानभवनात भेट घेऊन निवेदन दिले. मुख्यमंत्री महोदयांनी महाविद्यालय शहरातच होईल असे स्पष्ट आश्वासन दिले.
नालेगाव परिसरातील कृषी विभागाची २५ एकर जागा उपलब्ध असून, हीच जागा महाविद्यालयासाठी सुचवली आहे. हे महाविद्यालय सर्व नागरिकांसाठी वैद्यकीय सुविधा उपलब्ध करून देईल व जिल्ह्याच्या विकासाला हातभार लावेल.
राज्य सरकारने अहिल्यानगर जिल्ह्यात शासकीय वैद्यकीय महाविद्यालय मंजूर केले आहे. हे वैद्यकीय महाविद्यालय अहिल्यानगर शहरातच व्हावे या मागणीसाठी गुरूवारी शहराचे आमदार संग्राम जगताप यांनी मुख्यमंत्री देवेंद्र फडणवीस व उपमुख्यमंत्री अजित पवार यांची विधान भवनात भेट घेऊन निवेदन दिले. यावेळी शासकीय वैद्यकीय महाविद्यालय अहिल्यानगर शहरातच होणार अशी घोषणा मुख्यमंत्री देवेंद्र फडणवीस यांनी करून आ. जगताप यांना आश्वासन दिले.
यावेळी दिलेल्या निवेदनात आ. जगताप यांनी नमूद केले आहे की, अहिल्यानगर जिल्ह्यामध्ये शासकीय वैद्यकीय महाविद्यालय मंजूर झाले आहे.
हे महाविद्यालय शहरातील मध्यवर्ती ठिकाणी होणे गरजेचे आहे. जेणेकरून शहरासह जिह्यातील सर्व नागरीकांसाठी वैद्यकीय सुविधा उपलब्ध होण्याच्या दृष्टीने सोयीचे होईल. या वैद्यकीय महाविद्यालयासाठी अहिल्यानगर शहरातील मध्यवर्ती भाग असलेल्या नालेगाव परिसरातील कृषी विभागाची 25 एकर जमीन उपलब्ध आहे. सध्या ही जागा वापरात नसून त्या जागी जर सदर शासकीय वैद्यकीय महाविद्यालय सुरू केल्यास सर्व नागरिकांची चांगली सोय होईल.
अहिल्यानगर जिल्ह्यासह सोलापूर, पुणे व मनमाड जिल्हांना जोडणारा हा मध्यवर्ती भाग आहे. तरी अहिल्यानगर जिल्ह्यात मंजुर झालेले शासकीय वैद्यकीय महाविदयालय कृषी विभागाच्या नालेगाव येथील 25 एकर जागेमध्ये होणेबाबत योग्य ते आदेश द्यावेत अशी मागणी आ. जगताप यांनी केली आहे.
